الشمر عزوتي

جيت اكتب القيفـان واختـار قيفـان
وابـدي سلامـي العزوتـي بالتحايـا
حنـا طنايـا لاغـدا الوقـت نيـران
حنـا شمـوخ العـز حنـا شفـايـا
يا عاذلي فينا الفخـر صـار عنـوان
حنـا الطنايـا مـا نهـاب المنـايـا
شمر ثقال الـروس يعلـون بالشـان
لا لا تفكـر مــا نـعـز العطـايـا
كل الفخر افخر بـا غاليـن الاثمـان
حنـا الرجولـه والرجولـه عطـايـا
الله يبي يخلق مـن النـاس انسـان
فيـه الشهامـه والشهامـه هـوايـا
وحنا على مشهـود تاريـخ فرسـان
فينـا الشجاعـه دوم بيـن الحنايـا
من ( دار حايل ) دارنا عـز الاوطـان
لديـار شمـر ( بالجزيـره ) سرايـا
كـل القبايـل فخرنـا دون نـكـران
لاكن انا خصيت ربعـي ( الطنايـا )
حبيـت اذكـر كـل فـارس بميـدان
شيـوخ شمـر بـا المكـارم سعايـا
اجدودي الي بالصخه تطلـق ايمـان
افعالهـم تـذكـر ولاهــي خفـايـا
صفـوك دايـم صـار للبـر سلطـان
( ذيب المراجل ) والشجاعـه هوايـا
وفرحان جدي عزنـا الباشـا فرحـان
نسل الشيـوخ وعزنـا صـار غايـا
والي كسب صيت الكرم دون نقصـان
عبد الكريـم الـي صخـه بالعطايـا
( وفيصل ) شموخ العز في كل الازمان
راي .. الكرم والمرجله فيـه .. رايـا
والي كسب تاريـخ مجـدن وعنـوان
( الياور ) الـي مـا يهـاب المنايـا
والي كسب صيت الزعامـه بوجـدان
( النوري ) الي كـان شيـخ الشفايـا
عزه من اخوانـه واخوانـه اخـوان
افعالهـم مثـل النـجـوم بسمـايـا
واحدهـم الـي يبـرز بكـل ميـدان
فرسـان بالهـدات تسـري سـرايـا
واختم قصيدي بالشعر حيـل خجـلان
لايكون انـا قصـرت ذكـر الطنايـا